今時今日無論返工返學，都難逃頸梗膊痛嘅厄運。有時做完運動仲會周身痠痛（就算已經拉咗筋），真係好難受… 除咗等肌肉慢慢自然恢復同叫人按下，不妨考慮買返枝按摩槍，比人手更舒服強勁，想幾時嘆就幾時嘆！但因為威力強勁，用錯隨時整傷自己，嚴重起嚟會加劇傷勢，甚至引致中風、死亡！所以大家喺選購前，記得睇埋安全須知！為令大家安心選購合適自己嘅按摩槍，以下同大家分享按摩槍選購指南同安全須知。

原理及功效

每當肌肉受傷，底層筋膜可能一併受損，導致筋膜同肌肉或附近組織形成沾黏，繼而產生緊繃同痠痛感覺。按摩槍透過反覆高頻震動，一方面解除肌肉緊繃同刺激筋膜，另一方面加速痠痛部位血液循環，有效舒減肌肉僵硬、疼痛。

選購要點

1. 轉速及檔數

大部份型號設多於1個變速檔數，可依個人喜好、需要揀選。一般而言，每分鐘1,800-3,000轉可有效放鬆同促進血液循環。

2. 尺寸及重量

部份型號機身輕巧便攜、使用負擔較小，但效能或震動力度可能相對較弱。

3. 噪音

想享受寧靜舒適又唔騷擾其他人，可選購設有加強靜音、低分貝嘅按摩槍。

4. 續航力

如果運動頻率高或你要經常帶按摩槍出街，建議選購續航力較高型號，減少頻密充電或無電嘅煩惱，亦可選購一些可以充電式的型號。

5. 按摩頭

每個按摩頭都各有特色同其適用位置。如需按摩多個部位，建議選購具備相關按摩頭之型號。普遍按摩頭種類如下：

• 球狀頭：適用於手臂、腰背、背部、臀部、大腿及小腿等大範圍肌肉
• 扁平頭：適用於肩部及四肢，刺激更深層肌肉組織
• 錐形頭：適用於經絡、關節、手掌、足底，有效衝擊深層組織
• U型頭：適用於頸部、脊柱、腳踝跟腱兩側，需避開骨頭使用*

*頸椎、脊椎部位較脆弱、易受傷，建議交由專業醫師/物理治療師操作

安全須知

1. 位置

由於高頻震動可能傷及內臟、神經線、淋巴、大動脈壁，所以唔適宜用於臉部、頭部、大動脈、腋下、胸腹、頸椎、脊椎、腰椎、關節、肌腱韌帶、股動脈。另外，避免使用於傷口、淤青、紅腫或發炎部位。

2. 時間

按摩時間並非越耐耐好，太長時間按摩同一位置反而會令肌肉組織受傷。一般建議按摩時間為每次5-10分鐘，安全又有效。

3. 力度

按摩並非大力先有效，力度過大可能導致瘀血形成，甚至骨折，後果非常嚴重！如果用到覺得痛，記住要調低返力度。

4. 不宜使用按摩槍人士

嬰幼兒、未成年人、孕婦、佩帶起搏器、骨折或體內有金屬內容物者。

小貼士

1. 因應部位所需揀選合適按摩頭，提升功效。

2. 先適應較輕力度（可由最低檔位開始）再逐漸加強力度，避免力度過大而受傷。

3. 不宜集中1點或1個位置不斷按壓。

4. 按摩槍可以幫助舒緩肌肉痠痛，但唔能夠代替運動或拉筋，所以大家要多運動、多拉筋啊！