循環扇原理

循環扇同普通風扇不同之處在於其扇葉同風扇設計可以令吹出嚟嘅風產生柱狀渦流效果，風向亦都更集中，而渦旋式嘅送風方法就可以提高風嘅直吹速度，令吹出嚟嘅風可以吹得更遠同更集中，室內空氣可以喺每個角落循環同對流，有效咁降低室內溫度。

同普通風扇有咩分別？

普通風扇嘅作用只係將空氣擴散，能快速降低人體溫度，而唔可以有效率咁提高室內嘅空氣循環，所以如果係好熱嘅情況下，用一般普通風扇就需要用較長時間先可以降低室內溫度。

而好多人使用循環扇個陣都會搭配冷氣嚟用，由於可以令到空氣循環，所以能夠將冷氣嘅風吹向室內每個角落，覆蓋以往用普通風扇未必吹到嘅範圍，更短時間為室內降溫。冬天嗰陣更可以搭配暖氣，短時間令室內變得溫暖。

循環扇優點

1. 省電 ︰循環扇可以將室內空氣反覆循環，加強空氣對流，令室內溫度快而又有效率咁達到理想溫度，建議可以將冷氣機溫度設定喺25℃至26℃之間，而當溫度每提高1℃，配合循環扇使用嘅情況下，就可以節省大約6%嘅電力。

2. 抽濕︰由於可以令空氣循環，因此能夠有效咁帶走空氣中嘅濕氣，降低空氣中嘅濕度，加速乾燥衣物

3. 四季通用︰可以搭配冷氣同暖氣使用，四季都可以享受到均衡嘅溫度

循環扇缺點

1. 降低人體溫度較慢︰循環扇主要功能係快速促進空氣循環，而由於風力更集中，因此並唔適合直吹人體。如果購買目的係希望可以快速咁降低人體溫度，普通風扇會更適合。

購買前需注意

1. 擺頭角度︰市面上常見嘅循環扇擺頭角度有90度，180度同360度，如果想追求比較好嘅空氣循環效果，建議購買180度及360度循環扇，能更有效加強空氣流動，促進室內空氣循環。

2. 清潔問題 ︰同普通風扇一樣，循環扇需要清洗扇葉、風扇罩先可以維持功能，因此建議購買易拆洗同安裝嘅機種。現時都推出咗好多無扇葉嘅循環扇，只需用到抹布就可以完成清潔，方便保養之餘，安全性亦更高。

3. 風速及音量︰循環扇可提供不同模式﹑風速及定時開關等供用家自行調節，用家入手前亦可以考慮音量問題，想有更好嘅睡眠質素可購買設靜音模式嘅循環扇。