2025外置硬碟选购指南及人气推荐

外置硬碟有咩用？

内置硬碟安装喺主机或者手提电脑入面，负责储存全机资料，包括程式、档案以至整个运作系统，无咗佢电脑根本无法运行。至于外置硬碟，顾名思义就係喺电脑外面嘅储存装置，一般有四大用途：

1. 释放内存空间

内置空间有限，尤其机身又轻又薄嘅手提电脑。一般文书处理嘅电脑只得256GB甚至128GB内存，装完程式分分钟已经无咩位剩！内存不足的话，电脑就会变慢甚至死机。将其他档案移到外置硬碟无疑係个好方法。

2. 提升读取速度

相片、影片、游戏……嘅质素愈嚟愈高，档案亦跟住变大，内置硬碟点会唔吃力，电脑点会唔变慢？如果用着一啲对系统要求高嘅程式，例如攞嚟执相剪片，睇片打机，情况就更加明显。正因为咁，外置硬碟几乎係设计师、摄影师、YouTuber嘅必备工具，咁样做嘢先会顺手有效率。而唔少PlayStation、Xbox玩家都会帮游戏主机加外置硬碟，游戏唔再窒窒下，玩都玩得尽兴啲喇！

3. 备份

内置硬碟就係电脑嘅记忆，佢有咩头晕身㷫——过热、中毒、碰撞、唔小心浸咗水……种种危机都有机会令佢失灵，违失资料甚至连电脑都开唔返，又点可以唔定期用外置硬碟备份呢？

4. 传输档案

外置硬碟插线即用，毋须安装程式或者连接网络都可以存取档案，非常方便。而当要传输较大嘅档案嗰阵，上传下载可能要几个钟，万一网络接收不良更要重头嚟过。哩个时候用外置硬碟转传档案，几十秒至一分钟就搞掂。

外置硬碟点拣好？

用HDD定SSD技术？

HDD係指传统硬碟，而SSD就係新式嘅固态硬碟。SSD係读写速度同耐用度上面，都比HDD优胜。而HDD最大嘅吸引力，就係价格较便宜，换言之以同样嘅价钱就已经买到比SSD大嘅储存空间。加上HDD嘅防护技术有所提升，比以前更耐用，所以至今仍然不乏粉丝。

要拣HDD抑或SSD，主要都係视乎用途。如果经常需要读取大型档案，例如画图、执相或者剪片，又或者希望改善游戏流畅度的话，SSD会係较理想的选择。而如果只係应付一般文书工作，或者用嚟做备份，咁HDD绝对足以胜任，有预算都情愿拣大啲嘅储存空间。

买几大容量先够？

最简单又诚实嘅建议，就係睇预算做人，有大买大，当长远投资。将来内置硬碟嘅负荷只会愈嚟愈重，需要移施去外置硬碟备份嘅档案有增无减。况且，多啲用外置硬碟减轻内存压力，电脑会更耐用，何乐而不为？

不过要留意，容量愈大，体积同重量会相应增加。如果需要带备在身，可考虑买一大一小，一个用嚟备份，一个用嚟暂存档案。

连接方法拣边种？

通常你会见到规格上写USB2.0、 3.0、3.1 Gen1 ……如果你觉得混淆，放心你并不孤单。简单嚟讲，数值愈大代表愈新款，传输速度愈快。USB可以向后兼容，所以无论拣边一款都可以正常存取档案。

另外，要留意你所用嘅电脑用边一款接孔。以2016年后出产嘅Mac为例，只有Type C口，拣一个配备Type C线嘅硬碟就会方便好多。要注意，由于USB每次推出新标准，输送量都进步近两倍，旧制式始终会逐渐被淘汰，愈大机会需要读卡器才能读取。

要拣返作业系统专属嘅硬碟？

作业系统有佢自己嘅语言，而大部分外置硬碟嘅预设格式都係Window先识睇嘅NTFS。如果想俾Mac用，就要将硬碟格式化并改成HFS。如果硬碟会经常游走两个系统，就可以拣两个系统嘅共通语言——FAT32或者exFAT。