广东话有一句俗语：「辛苦搵来自在食」，冇咩比自由自在食餐Lunch更能够帮打工仔恢復元气。不过，讲就容易，几乎每间公司嘅茶水间喺放饭时段都好繁忙，加上疫情之下多咗同事选择带饭，微波炉前嘅人龙就愈嚟长，排队叮饭要愈嚟愈耐，又点叫得上自在呢？

唔想咁？不妨试试「带饭恩物」加热饭盒，放饭前预好时间加热，一够钟就食得！事实上，市面早已反映打工仔嘅心声，推出咗形形色色嘅加热饭盒畀大家选择。

1. 安全衞生
食安非常重要，饭盒首要係够密封，甚至可以抽真空，保持饭餸新鲜、不变坏。其次，要使用通过食品级安全认证嘅物料，确保适合放置及加热食物。当然，附设防乾烧、过热自动关机等保护机制都好重要。

2. 轻松易携
带饭要经过通勤嘅考验，饭盒或食物盒内胆必须够轻便、盒盖具防漏和安全锁扣等设计。毕竟，行路可以有风，饭盒可以揈过90度，先算得上逍遥自在嘛！

3. 健康省时
好多人以为微波炉翻叮饭盒会有辐射，又或者会令食物流失营养，但其实呢啲理论暂时都冇确实嘅科学证据支持。反之长时间蒸煮，造成大量水蒸气，会有更大机会令营养随之流失。所以，应该选择让食物能够喺较短时间内均匀受热嘅饭盒，务求保留餸菜嘅鲜味同埋营养价值。有啲型号更有定时预设功能，或专用手机应用程式，咁你就可以更准确预算加热温度同时间，做个时间管理达人喇！

4. 方便易洗
返工食饭时间係得咁多，食完饭有时间剩都情愿休息下，所以容易清洗嘅饭盒绝对有分加。选购之前可以留意饭盒或者食物盒内胆係咪可以轻易拆卸，係咪属于不锈钢、陶瓷等较易洗嘅物料。

5. 煮食功能
有啲蒸煮饭盒嘅功能唔只加热咁简单，直情适合打工仔係办公室煮食，享用新鲜热辣嘅饭菜。只要早一晚在家准备好简单食材，放饭前洗落米，就可以一边蒸饭一边蒸餸。唔想食饭，亦可以用佢哋嚟煲粥、煮麵、蒸点心，诸如此类，正好发挥创意。其实，网上有唔少网友分享零失败嘅办公室食谱，成品外表讨好，就连甜品都有，值得一试！无论你係喺办公室拥有较大自由度嘅幸福一族，定係经常要加班或返夜更嘅忙碌一族，都可以放个蒸煮饭盒傍身，煮一人饭慰劳自己又得，煮宵夜同自己加油亦得。