循环扇原理

循环扇同普通风扇不同之处在于其扇叶同风扇设计可以令吹出嚟嘅风产生柱状涡流效果，风向亦都更集中，而涡旋式嘅送风方法就可以提高风嘅直吹速度，令吹出嚟嘅风可以吹得更远同更集中，室内空气可以喺每个角落循环同对流，有效咁降低室内温度。

同普通风扇有咩分别？

普通风扇嘅作用只係将空气扩散，能快速降低人体温度，而唔可以有效率咁提高室内嘅空气循环，所以如果係好热嘅情况下，用一般普通风扇就需要用较长时间先可以降低室内温度。

而好多人使用循环扇个阵都会搭配冷气嚟用，由于可以令到空气循环，所以能够将冷气嘅风吹向室内每个角落，复盖以往用普通风扇未必吹到嘅范围，更短时间为室内降温。冬天嗰阵更可以搭配暖气，短时间令室内变得温暖。

循环扇优点

1. 省电 ︰循环扇可以将室内空气反复循环，加强空气对流，令室内温度快而又有效率咁达到理想温度，建议可以将冷气机温度设定喺25℃至26℃之间，而当温度每提高1℃，配合循环扇使用嘅情况下，就可以节省大约6%嘅电力。

2. 抽湿︰由于可以令空气循环，因此能够有效咁带走空气中嘅湿气，降低空气中嘅湿度，加速乾燥衣物

3. 四季通用︰可以搭配冷气同暖气使用，四季都可以享受到均衡嘅温度

循环扇缺点

1. 降低人体温度较慢︰循环扇主要功能係快速促进空气循环，而由于风力更集中，因此并唔适合直吹人体。如果购买目的係希望可以快速咁降低人体温度，普通风扇会更适合。

购买前需注意

1. 摆头角度︰市面上常见嘅循环扇摆头角度有90度，180度同360度，如果想追求比较好嘅空气循环效果，建议购买180度及360度循环扇，能更有效加强空气流动，促进室内空气循环。

2. 清洁问题 ︰同普通风扇一样，循环扇需要清洗扇叶、风扇罩先可以维持功能，因此建议购买易拆洗同安装嘅机种。现时都推出咗好多无扇叶嘅循环扇，只需用到抹布就可以完成清洁，方便保养之馀，安全性亦更高。

3. 风速及音量︰循环扇可提供不同模式﹑风速及定时开关等供用家自行调节，用家入手前亦可以考虑音量问题，想有更好嘅睡眠质素可购买设静音模式嘅循环扇。